* * *
მაჯუდ პუხათ ქეშაპონე დიხას,
კარაკუნჩხას ქოუპირუ ჭითათ,
მორიალეს, მოროშ გამნარყ, რინტალს
ლეკუხაშა ქინთუტყობინ, ქინგარს,
ჯი აკულებ, აშო ვარწყე გიმალს,
ვაიჭარექ, წამალ მუჭო დიკაკ,
წვადშა თიზმა იკეკ, თიზმა იხვანც,
აცანცალუ ასე კუდელ რიალ,
ლეკუხაშ აქ ფურცელ ქუდარღ ჭიფას
მორიალეშ სიცოდილით, ჯინათ,
მითინ ვარე, არძა მიკმალ-დიკმალ,
მით რენ, ქურსით მინოლაფას ინჭანს,
ჩხანაქ ჩხორეფ აკოკორობ, რჯღიმალქ,
ნაკორობას გართანს, კართას იბშანს,
მორიალეს ქაშუ შარაქ გიმალქ,
ჩხორო ჭუა ჩხორო გვალას ქიმკარღ,
გურს აცხვანტალ ხიოლ სარკო, რცხიმალ,
ლეკუხაშ ას მუთოტყობუ ტიბას,
მაჯუდ პუხა ქოხუტოლუ დიხას,
კარაკუნჩხას პეულ გაფაფ ჭითათ,
მორიალე, მოროშ გამნარყ, რინტალ
ვერანტალუ, უბაღ, მუთ ჟი მიკაბ.
***
ნუზუ მუჭო ურზუ,
ქარბორიას უთურს,
მიორქია უწუ, _
სხუნუნს,
სხუნუნს,
სხუნუნს…
ჯღარ ნოელეფ ქუდურღ,
კისერს ათასკ, ჯუნუნს,
ანდა ფირქიქ ქუცუ, _
უკულ,
უკულ,
უკულ…
ცას ჭვემა მაბ პუხუს,
მუთ ვარდ ართათ ქუმურს,
ხიოლს გური ურუ,
ფულუნს,
ფულუნს,
ფულუნს,
ორაგადე მუთ რდუ
ვარაგადე მუთუნს,
ცას ბჟაქ ჩხორეფ აკურთ
ქუმწურღ,
ქუმწურღ,
ქუმწურღ,
ყოროფა რე ჭურჭულ
უთებუ დო ყურმულ,
ურა ცხენეფს შურშურ
ურულ,
ურულ,
ურულ,
ქარბორია უთურ,
მიკახორცხუ ნუზუს,
ნუზუ თაში ურზუ,
უსხუნ,
უსხუნ,
უსხუნ…
