სხვადასხვა გეიმინგ-სერვისი ძალებს იკრებს. როგორც უკვე ვიცით, რამდენიმე დღის წინ Microsoft-მა წარადგინა პერსონალური კომპიუტერებისთვის განკუთვნილი Xbox Game Pass და გააფართოვა მომსახურებები Game Pass Ultimate-ის ფარგლებში. ამჯერად კი ფრანგულმა კომპანია Ubisoft-მა გადაწყვიტა გადაედგა საპასუხო ნაბიჯი და წარადგინა ანალოგიური სერვისი Uplay + პერსონალური კომპიუტერებისთვის. სერვისის ამოქმედება 3 სექტემბრისთვისაა დაგეგმილი, მისი ღირებულება თვეში 15 დოლარი იქნება.
Ubisoft-ის ხელმძღვანელობის განცხადებით სერვისის გამომწერი გეიმერები მიიღებენ სრულ და შეუზღუდავ წვდომას თამაშების უზარმაზარ კოლექციაზე. მასში ის თამაშებიც შევა, რომლებიც ჯერ დამუშავების პროცესშია და სამ სექტემბრამდე გამოვა, აგრეთეე მიიღებენ Ubisoft-ის კლასიკურ პროექტებსა და სხვადასხვა პოპულარულ სერიულ პროდუქტს.
საბაზისო ვერსიების გარდა სერვისი მომხმარებლებს სთავაზობს განსაკუთრებულ გამოცემებსაც, რაც მოიცავს სხვადასხვა დამატებასა და ბონუს-მასალებს. ამასთან, სერვისის გამომწერებს გარანტირებული წვდომა ექნებათ ბეტა-ტესტირების რეჟიმში მყოფ პროექტებში მონაწილეობაზე ოფიციალურ ანონსამდეც. კოლექცია მუდმივად განახლდება სიახლეებით, სერვისის გამოწერაზე უარის თქმა კი ნებისმიერ დროს იქნება შესაძლებელი.
ყველა, ვინც ოფიციალურ ვებ-გვერდზე დარეგისტრირდება 15 აგვისტომდე, შეძლებს ისარგებლოს დროებითი უფასო სერვისით, რომელიც 3-დან 30 სექტემბრამდე გაგრძელდება. სექტემბრის დასაწყისში Ubisoft გეიმერებს ელექტრონულ წერილებს გაუგზავნის საცდელი ვადის დეტალების შესახებ. ასევე მათ, ვინც 15 აგვისტომდე დარეგისტრირდება, Ubisoft შესთავაზებს თამაშის ორ ექსკლუზიურ ნივთს Tom Clancy’s Ghost Recon Breakpoint-ისა და Watch Dogs Legion-ისთვის.
საინტერესოა, რამდენად წარმატებული იქნება ხსენებული შემოთავაზება და გასცდება თუ არა იგი პერსონალური კომპიუტერის ვერსიის ფარგლებს: ყოვლისმომცველი სერვისები უკვე გართობის ინდუსტრიის ტენდენციაა. მიმდინარე წელს Apple-იც გამოუშვებს თავის გეიმინგ-სერვის Arcade-ს. აგრეთვე აღსანიშნავია Google Stadia, PlayStation Now და Microsoft xCloud.
