წინამდებარე გამოცემაში სრულად ვაქვეყნებთ აკაკი ჭანტურიას არქივში შენახულ ზღაპრებს ოქროს კრავისა და ოქროს ვერძის შესახებ. ოთხი ადრე გამოქვეყნდა «ფილოლოგიურ ძიებანში» და ორიც ჟურნალ «აიაში» . აღნიშნული ზღაპრების შესახებ თავის დროზე მოხსენდა თსუ ფოლკლორისტიკის კათედრის ღია სხდომას (გამგე, პროფ. ზ. კიკნაძე). მეგრულ ტექსტს ერთვის პარალელური ქართული თარგმანი.
ქართული თარგმანის რედაქტირებაზე მუშაობდნენ ბატონები ანდუყაფარ ჭეიშვილი და ომარ გოგიჩაიშვილი, რისთვისაც დიდ მადლობას მოვახსენებთ.
მადლიერების გრძნობით ვიხსენებ აწ განსვენებულ, დოცენტ ანდრო ლეკიაშვილის საგულისხმო კონსულტაციებს.
დამატებით ვაქვეყნებთ, აგრეთვე, ოქროს კრავთან დაკავშირებულ ორ ლექსს, წარმართული ღმერთების გადაძახილს, ლეგენდებს თბილისის დაარსებისა და თამარ მეფის შესახებ.
იმედია, ეს მასალა ინტერესს მოკლებული არ იქნება მკითხველისთვის.
არიანე ჭანტურია
